बल्लारपूर, मुल, पोंभुर्णा तालुक्यांचे भवितव्य ठरवा .!
बल्लारपुर (का.प्र.) : महाराष्ट्राचे माजी अर्थमंत्री आणि विद्यमान वनमंत्री सुधीर मुनगंटीवार यांच्या नेतृत्वाची प्रशंसा करत राष्ट्रवादी काँग्रेसचे नेते छगन भुजबळ यांनी बल्लारशा विधानसभा क्षेत्रातील मतदारांना मुनगंटीवार यांना मोठ्या मताधिक्याने निवडून आणण्याचे आवाहन केले आहे. सावित्रीबाई फुले यांचे नाव पुणे विद्यापीठाला देण्यात महत्त्वाची भूमिका बजावणाऱ्या मुनगंटीवार यांच्या सामाजिक व राजकीय योगदानावर भुजबळ यांनी प्रकाश टाकला.
छगन भुजबळ म्हणाले, “सुधीर मुनगंटीवार हे राजकारणातील द्रष्टे नेते आहेत. त्यांनी केवळ बल्लारशा किंवा चंद्रपूरच नव्हे तर संपूर्ण महाराष्ट्राच्या विकासासाठी योगदान दिले आहे. पुणे विद्यापीठाला सावित्रीबाई फुले यांचे नाव मिळावे यासाठी त्यांनी विधानसभेत ठामपणे आवाज उठवला. त्यांच्या अथक प्रयत्नांमुळे ही ऐतिहासिक गोष्ट घडली. त्यांच्या नेतृत्वामुळे संपूर्ण समाजाला प्रेरणा मिळाली आहे."
भुजबळ यांनी मुनगंटीवार यांच्या कार्यशैलीचा गौरव करताना अनेक मुद्दे अधोरेखित केले. त्यांनी मुनगंटीवार यांचे जल, जंगल आणि जमिनीसाठीचे योगदानही अधोरेखित केले. “आज बल्लारशा विधानसभा क्षेत्रात विकासाची जी गंगा वाहत आहे, ती सुधीरभाऊंच्या दूरदृष्टीमुळेच शक्य झाली आहे. त्यांच्या माध्यमातून शेतकऱ्यांना मदतीचा हात मिळाला, तर युवकांसाठी नोकरीच्या संधी निर्माण झाल्या,” असे भुजबळ म्हणाले.
मुनगंटीवार यांच्या नेतृत्वाखाली बल्लारशा क्षेत्रात शैक्षणिक, आरोग्य, आणि कृषी क्षेत्रात उल्लेखनीय प्रगती झाली आहे. जिल्ह्याला वन व पर्यावरणाच्या क्षेत्रात विशेष ओळख मिळवून देण्याचे काम मुनगंटीवार यांच्या पुढाकाराने झाले आहे. त्यांनी चंद्रपूर जिल्ह्यातील वनसंपत्ती व जैवविविधतेसाठी केलेले प्रयत्न हे राज्याच्या इतर भागांसाठी प्रेरणादायी आहेत.
छगन भुजबळ यांनी स्पष्ट केले की, "सुधीर मुनगंटीवार यांच्यासारखा समर्पित आणि निःस्वार्थी नेता निवडून आणणे ही काळाची गरज आहे. त्यांच्या प्रयत्नांमुळे महाराष्ट्रात कृषी अर्थव्यवस्थेला बळ मिळाले आहे. त्यांनी महत्त्वाच्या धोरणांवर भर देत प्रत्येक घटकाला न्याय मिळवून दिला आहे."
मुनगंटीवार यांचा सामाजिक सलोखा टिकवण्यासाठीचा दृष्टिकोनही भुजबळ यांनी अधोरेखित केला. “भेदाभेद दूर करून सर्वसमावेशक विकासासाठी झटणाऱ्या सुधीरभाऊंसारख्या नेत्याला साथ देणे ही आपली जबाबदारी आहे. त्यांच्या योजनांमुळे आज अनेक गावांचा कायापालट झाला आहे. त्यांच्या नेतृत्वाखाली बल्लारशा ही आदर्श मतदारसंघ म्हणून उदयास येत आहे,” असे भुजबळ यांनी सांगितले.
भुजबळ यांच्या या आवाहनामुळे बल्लारशा क्षेत्रातील राजकीय वातावरण तापले आहे. त्यांच्या या विधानामुळे मतदारांवर परिणाम होईल, अशी शक्यता व्यक्त केली जात आहे. सुधीर मुनगंटीवार यांच्या विजयासाठी जनतेची अभूतपूर्व साथ मिळण्याची शक्यता वर्तवली जात आहे.